အလုပ်ရှင်လုပ်သမျှ ခံနေရ

10:55 PM | Posted in
ပထုံဌာနီမှ မြန်မာအလုပ်သမားတဦး (The NEJ)

အခုထုတ်ပေးနေတဲ့ ယာယီမြန်မာနိုင်ငံကူးလက်မှတ်နဲ့ ပတ်သက်ပြီး မြန်မာအလုပ်သမားတွေကို အသိပေးချင်ပါတယ်။ ဘန်ကောက်မြို့အနီးက ပထုံဌာနီမှာရှိတဲ့ ပလတ်စတစ်အလုပ်ရုံက ကျနော်အပါအ၀င် အလုပ်သမား (၇) ဦးဟာ အလုပ်ရှင်နဲ့အတူ မြ၀တီမြို့မှာ မြန်မာဘက်ကထုတ်ပေးတဲ့ ယာယီနိုင်ငံကူးလက်မှတ် သွားလုပ်ကြပါတယ်။

တယောက်ကို ဘတ် (၆,၅၀၀) ကုန်ပြီး (၂) နှစ်သက်တမ်းရှိတဲ့ ဗီဇာလက်မှတ်ရခဲ့ပါတယ်။ ဒီလက်မှတ်နဲ့ ထိုင်းတနိုင်ငံလုံးမှာ လွတ်လပ်စွာ သွားလာခွင့်ရှိတယ်လို့ ထိုင်းနဲ့မြန်မာအစိုးရတွေက ပြောထားပါတယ်။ ဒါပေမယ့် ဘန်ကောက်ပြန်ရောက်တော့ ကျနော်တို့ရဲ့ ယာယီနိုင်ငံကူးလက်မှတ်တွေကို အလုပ်ရှင်က သိမ်းလိုက်ပါတယ်။

ဆိုတော့ ကျနော်တို့တတွေဟာ အရင်ဘ၀ပဲ ပြန်ရောက်သွားပါတယ်။ ဘယ်ကိုမှ လွတ်လပ်စွာ သွားခွင့်မရှိပါဘူး။ အခု ကျနော်တို့လက်ထဲမှာ ရှိနေတဲ့ ထိုင်းကထုတ်ပေးတဲ့ အလုပ်သမားလက်မှတ်ဟာ သက်ဆိုင်ရာနယ်မြေကနေ အခြားတနယ်ကို သွားခွင့်မရှိပါဘူး။ ကိစ္စကြီးငယ်ရှိလို့ နယ်ကျော်သွားမိရင် အဖမ်းခံရပြီး နယ်စပ်ပြန်ပို့ခံရတာတွေ၊ ငွေညှစ်ခံရတာတွေ မကြာခဏကြုံတွေ့ကြရပါတယ်။

အခုမြန်မာဘက်က ထုတ်ပေးတဲ့ အနီရောင်ယာယီနိုင်ငံကူးလက်မှတ်အတွက် တရားဝင်ကုန်ကျငွေက မြန်မာဘက်ကို ကျပ် (၃,၀၀၀) နဲ့ ထိုင်းလ၀ကကို ဗီဇာကြေးဘတ် (၂,၀၀၀) ပဲ ပေးရပါတယ်။ အဲဒါကို အလုပ်ရှင်က ပွဲစားနဲ့ပေါင်းပြီး တယောက်ကို ဘတ်ငွေ (၆,၅၀၀) ယူပါတယ်။ ဒီငွေတွေကို အလုပ်ရှင်က မပေးပါဘူး၊ အလုပ်သမားကပဲ ပေးတာပါ။ ဒါကြောင့် ဘယ်လိုအနေ အထားတွေပဲပေါ်ပေါ် အလုပ်သမားတွေကတော့ နင်းပြားဘ၀ကနေ တက်လမ်းမမြင်သေးဘူး။ သက်ဆိုင်ရာအစိုးရတွေက ဘာပြောပြော လက်တွေ့မှာ အလုပ်ရှင်တွေ လုပ်သမျှခံရတာက ကျနော်တို့ အလုပ်သမားတွေပါ။ ဒါကြောင့် တခြား ဘ၀တူ အလုပ်သမားတွေအနေနဲ့ ကျနော်တို့လို မိအေးနှစ်ခါနာတဲ့အဖြစ်မျိုး မရောက်အောင် ကြိုတင်ပြီး လိုအပ်တာတွေ ပြင်ဆင်နိုင်အောင် ကျနော်တို့ရဲ့အဖြစ်အပျက်မှန်ကို တင်ပြလိုက်ရခြင်း ဖြစ်ပါတယ်ခင်ဗျား။